|
SAMA-TALIS: (Gabay).
Maxamed Axmed Jaamac (Kuluc).
SIINLEYDA 4aad: 10/11/2009
Sifaha gabay abwaannada sidoow, waad ku saxantiine
Salaan iyo waxaad leedihiin, soo-dhaweyn mudane
Siinleey haddii aad furteen, waa sidaan rabaye,
Sirta hadalka suugaanta gabay, sowdka iyo luuqda
Aan sifeeyo caawoo kaluu, siinad leeyahaye.
Soomaali waan wada og nahay, seebka ay tahaye
Sixir iyo mariiq iyo hadduu, saxalku uu haysto
Haddii suuraddoodiyo wakhtigan, suulay magacoodu
Sakatiga colaaddiyo dilkiyo, sumucna gaagaabshey
Hadday maatidii silicsantoo, soolka ku asqowdey
Allaha saatiraan u barinnee, samo ha gaadhsiiyo.
Sifo kalena waan ka hadlayaa, si ad u fahantaane
Sokeeyaha haddii aad dhibtiyo, sama- wadeenkaaga
Haddii aad sagsaag iyo xumaan, siidhi ku afuufto
In belaayo sahaydaada noqon, waa mid aad sugiye,
Sowdka koonfureed tay dhigeen, hele sawaabkiiye
Annagana allaha Saatirki'i, wuu na-saacidaye
Soomaalilaan noo hir geli, socotadeediiye
Saylac iyo ilaa Xiis haddaan, samo ku naallaaye
Iminkaan sar iyo fooq ka simay, suuqyadii Herere
Safarrada adduunyada haddaan, samo u gooshnaaye
Iminkaa Suweys lagu meteley, Saaxil iyo Maydhe
Sarrifkiyo hadduu dahabku yaal, suuqa laammiga'e
Aan saaqid boobiyo la-arag, tuug sagsaag wada'e,
Soomaalilaan waa ammaan, waana loo saxaye
Saaxiibkay Muusoow ma garan, sidaad wax leedahay.
Suugaan haddaad tirinaysoo, suuqa lagu baahsho
Sulux iyo wanaag baa murtida, lagu sameeyaaye
Sawdka hadalka kii aan saxnayan, waa sun iyo booge
Sadarrada bal eeg ina Caloow, hadalkan kaa siibtey.
Waxaad tidhi samaan looma ledo, suuqyadii Herere
Waxaad tidhi Burcaa loo safnaa, saanjad roodhiyahe
Waxaad tidhi marsadii Saaxil waa, Saylac oo kale'e
Waxaad tidhi Saraar iyo Togdheer, saalo laga waaye
Waxaad tidhi safriyo lagama raro, sogobyo waaweyne
Soofkii ka madhey baad na-tidhi, Soolal iyo Cayne
Waxaad tidhi sabaan baa ku dhacay, Awdal oo simaye
Waxaad tidhi sartii qudhuntay baan, saani u arkaaye
Safaf xaydan baad sheegtay aan, lagu samaanayne
Waxaad tidhi kuwii talada sidey, sooma bay dhalane
Sebi qarana baad sheegtay oon, samada dhafayne,
Toban iyo sagaal sano ayuu, calanku saarnaaye
Hadmuu socon, hadmuu sebi ka bixi, waa suu'aal furane?
Sarbeebaha aduun baa caddayn, saad u leedahaye
Samir iyo dul-qaad baa wakhtigan, laysku soo simaye
Soomaalilaan waxay rabtaa, saani iyo toose
Wax kastoo sursuur gelinayana, way la socotaaye
In kastoo saluug uu jiriyo, maamul socon waayey
In kastoo sidii loo dhacsaday, layska kala seexday
In kastoo sibraarrada cammiran, soofka laga buuxshey
In kastoo samaantiyo nimcada, Saatir nagu beegay
In kastoo sabuul caydhnimiyo, silic na-loo diidey
Weli shacabku waa soomman yahay, waanu sugayaaye
Sebigiyo carruuruhu ma dhamin, caanihii Sulube
Kuwii talada loo saanyadaa, seegay marinkiiye,
Sidii socod socdaal geeddiyeey, siigo kiciyeene
Waxse Saatir qoray iga-Wallaan, cidi saluugteene
Sirta gudaha waa khalad qofkii, dibedda siiyaaye
Suugaan in lagu faafiyaa, seebka kuma taalle,
Hadday qaar sagsaag yara faleen, talona ay seegtay
Ha sahwiyin dar kale oo saxoo, saaniyaa imane.
Dadku waa sokeeyiyo tol iyo, siidh walaala ahe
Xumaha suuli samahana ka tali, saanina u waani.
ALLAA MAHAD LEH.
Maxamed Axmed Jaamac (Kuluc).
E-Mail: cismaanblack22@hotmail.com
Hargeysa - Somaliland.
|
